نبي نعلمك راني رقيق أعــزوم ... وما نحمله الفـــــــراق حتى يوم ...
ولو غبت عني نفقدك ونهـــــوم ... وتصبح سماي ملبده بغيــــــــوم ...
لا نشوف راحه ولانشوف النوم ... يضيق خاطري وبعبرتي مهموم ...
كيف الصغير ممتنع مفطــــــوم ... فاقد أرضاعه و منجبر محــروم ...
وين ما أطل نفرح وليك نقــــوم ... ننسى أحزاني و حيرتي والصوم ...
ولا نعاتبك لا نجادلك . لا نلـوم ... نظمك لحظني ونغمرك بنســـــوم ...
*****
نريد نعلم راهو رهاف أعزامي ... وتصعب اوقاتي بغيبتك وايامي ...
سهران دون الناس طار أنيامي ... ويزيد شوقي والغـلا و غرامـي ...
نخاف تبعدي يكمل العمرندامي ... يضيع الأمل ومعاه كل أحـلامي ...
نجحد فكسرت خاطري ونكامي ... ونرجى نشوفك ضاحكه قدامي ...
بعيني حنيني يبان . قبل كلامـي ... نا بحسبتي يومك يساوي عامي ...
أنتي حياتـي و الهناء وقسامــي ... أنتي الدواء و بلسم جميع الآمي ...
*****
نريد نعلمك راهو أعزومي رقاق ... ما نحمله بعدك ولا الفــــــراق ...
ولو غبت عني نفقدك نشتـــــــاق ... وتصبح حياتي جمر ما ينطـاق ...
وفي الهجـر تصبح دنيتي حـراق ... على طول هكي حالة العشــاق ...
يغوصوا فبحر الحـزن للأعمــاق ... وعالخد سـايل دمعهم رقـــراق ...
يريدوا الحبيب أترجعه الأشــواق ... يجيب الدواء والحب والتريـاق ...
ويبدل ظلام الليل بالأشــــــــراق ... يكمل معاي العمر وأحنا رفـاق ...
... من أشــعاري ...
.... محــمد الجــبالي ...